--------------------------------------------------------------------------------
أرجـع يالرحت بعيد عن بغـداد
وسكنت هناك دوله ما هي دولتنه
حقك من رحت جان الوضع مو زين
تفجيـر وقتـل وأرهـاب موتنه
بس هسه الوضع مو نفسه ذاك الجان
عراقييـن كلنا وهـاي طيبتنـه
بعد ماكو جوادر مأتم وأحـزان
كبل جانت كبل بسنين شدتنـه
عبرناها الشـدايـد والحمد لله
وهالدمع اليصب هذا دمع فرحتنه
كافي من الغرب مو صار خمس سنين
مل حتى الغـرب مو كثر غربتنـه
أرجع للأهل للصحبة والأحباب
نلتم مـن جـديد يا محله لمتنـه
أرجع للنجف لدهوك والأنبـار
لتكريت وسماوه أرجع لبصرتنه
أرجع
للفضل للثورة والنعمان
مناطقنه اصبحت والله جنتنه
يــا دجلة الخير يا أم البساتين
أرجع وأرتوي من ماي دجلتنه
أضربلك مثل صغير عن بغداد
حاول تفتهم وتشوف حيرتنه
بغداد الحضن والشرف والديره
والأم والحبيبـه وهي هيبتنه
عايف هالحضن وساكن بغير احضان
وعفت هذا الشرف وهجرت ديرتنه
أرجع والنصر والله يعود وياك
وبيدك هاي بيدك شيل رايتـنه
أدري أنته وفي وأدريك ما مرتاح
وتصيح الله واكبر لغربه ذلتنـه
وأدري أنته أصيل ومعدنك يا نوع
وأدري انته الشهم والغيره فزعتنه
أفرض بالغرب لاكاك ملك الموت
وبتراب نزلت ما
هي تربتنـه
درجع والجواز هناك شمره بعيد
ومزقها الأقامة وهاي فرحتنه
أرجع والفرح ينتظرك ابغداد
أرجع و الوطن محتاج وكفتنه
أرجع و الوطن محتاج وكفتنه
